Act 11 | KYG | STEP | Alu nofi vaya'mogi Goti ge'amo afite'a ali'a apaipafi'mo male'nae, hu'a hu'naya gemo apa vaya'e Yutiya kotega konaga vaya'mogi'e'mo afi'nae.

Acts 11

Pita'a uno Yulusalemu siosi vaya'aife'mo hapa pai'niya gemae

1 Alu nofi vaya'mogi Goti ge'amo afite'a ali'a apaipafi'mo male'nae, hu'a hu'naya gemo apa vaya'e Yutiya kotega konaga vaya'mogi'e'mo afi'nae. 2 Pita'a Yulusalemu taonifi'mo uno ava'yi hu'nige'apae'mo mago vaya'mogi hu'apae'mo, lapakufamo lagaiyo, hu'a nehaya vaya'mogi Pitafe'mo ge hau'apae'mo, 3 Kagaemo uka alu nofi vaya'mo apakufamo nolagaya vaya'ai nopi'mo haika apakae'e'mo magokepi mai'neka ne'ya'mo ne'nane, hu'a ge hau'nae. 4 Inagi Pita'a aepa fai'niya afinateti'mo afole aite afole aite huno afole ai'niya kavafe'mo ava gemo huno hapa pai'niye.

5 Hapa paino'ae'mo, Yopa taonifi'mo nunumu'mo hu'na mai'ne'nae'mo alagamuna agegekana hu'na mago kava'mo age'nove. Age'novana koku'napati'mo mago latapa lavolavomo lole'e lole'e atupale'mo nofi aeteno atalegeno nahaopale'mo emine'niye. 6 Aulu he'na agovana muki agufa afugi afela afugi nagalo'yavegi afela namagi hu'a mai'nage'na age'nove. 7 Agete'na afi'nogeno'ae'mo mago gemo naha paino'ae'mo, Pitao, huno, He tika heka kaeka no, huno naha pai'nige'nae'mo 8 Ala kava nene, hu'na, ha'ao. Lagaefe'mo Yu mono ke'aepa gemo'a huno'ae'mo, alu hosu afumo ame'amo o'neyo huno hu'nige'na mosi'nova yane, hu'na ha pai'nogeno'ae'mo 9 halate naha paino'ae'mo, Goti'a alino alagepa huno ate'niya yafe'mo hosu yane, huka osuvo, huno naha pai'niye. 10 Lole'e mago'e afina'mo ani gemo huteno muki ya'amo koku'napi'mo halate alino vayu hulino hai'niye. 11 Ne'agoge'apae'mo lole'e mago'e vaya'mo Sisaliya taonifati'mo alino apate'nige'a e'naya vaya'mo mai'nova note'mo ava'yi hu'nae. 12 Goti Auneme'amo'mo, Lole kagesa o'afika apakae'e'mo afa'a uvo, huno naha pai'niye. Nagae'e Yopa taonifi vaya'mo sigisi'a konaga'nimogi'e'mo magokepi lokaelita uta Sisaliya taonifi'mo uta agae nopi'mo faleta haita mai'none. 13 Agaemo, No'nifi'mo mai'ne'na agovana mago enisole vekamo he tino mai'neno'ae'mo, Kagaemo mago vaya'mo alika apatege'a u'a Saimoni Pitafe'mo ge hisageno eno. 14 Eno mago gemo lapa paisigetapa kagae'e muki konaga vayaka'e'mo ani gemo afisageno Goti'a ge'aleti'mo lapakufamo alino katino lapategaiye, huno naha pai'niye, huno naha pai'niye. 15 Nagaemo aepa fai'na gemo hapa nepaugeno'ae'mo Goti Auneme'amo hogoteno lagaete'mo emine'niya kava huno apakaete'mo emine'niye. 16 Agete'nae'mo Ala kava ne'mo'a huno'ae'mo, Yoni'a ani'aletike'mo faleno apate'niya'monanafa nagaemo Goti Auneme'aleti'mo fale'na lapategauve, huno laha pai'niya ge'ae'mo nagesa afi'na ho hu'nove. 17 Lagaemo Yesu Kalaisi'a Ala kava nefe'mo lagesa afita fatago hu'nonageno'ae'mo Goti'a Auneme'amo alino lami'niya kava huno alu nofi vaya'mo alino apami'niya'mofe'mo nagaemo ina agufa vekamoge'na Goti ka'mo afa'a akani'na o'ategauve, huno hapa pai'niye. 18 Ani gemo afite'apae'mo mago gemo osu'a Goti agi'aleke'mo ali'a asaga hute'apae'mo, Goti'a alu nofi vaya'mogi ofali'a afa'a maisayafe'mo apaipamo ali'a afe lesaya kava'mo alino apami'niye, hu'a hu'nae.

Atiyoki taonifi'mo siosimo afole ai'niya gemae

19 Sitiveni'a fali'niya afinateti'mo Goti mafa'ne'aitegamo lusi hanageke kava'mo afole ai'nige'apae'mo atale'a atagu fae'u'e'a hu'nae. Mago vaya'mo Finisiya kotegamo apaune he'u'a maige Saipalasi kotegamo apaune he'u'a maige Atiyoki taonifi'mo apaune he'u'a maige hu'a mai'ne'a Goti ge'amo Yu vaya'aifeke'mo ae'a hakalo hu'a hapa pai'nae. 20 Hapa pai'naya'monanafa mago vaya'mo Saipalasi kotegati vaya'e Sailini kotegati vaya'e'mo u'a Atiyoki taonifi'mo Galiki apakemo ne'aiya vaya'aife'mo Yesu'a Ala kava ne'mo ava gemo ae'a hakalo hu'a hapa pai'nae. 21 Goti'a alino lokiya vaino apate'nige'apae'mo asole vaya'mogimo ani gemo afite'a apakesa afi'a fatago hute'a Ala kava netegamo ai'a afe le'a e'nae.

22 Ani kavafe'mo ava gemo aino atagu faeno uneno hu'nige'a Yulusalemu siosi vaya'mogi ani gemo afite'apae'mo Manamasi'a ali'a ate'nageno Atiyoki taonifi'mo u'niye. 23 Uno apakeyana Goti'a fiku hapa maeno apami'nige'a alagepa hu'a mai'nageno apaketeno'ae'mo lusi kava huno amogaga aiteno hapa paino'ae'mo, alagepa hutapa lapakesa afitapa, lokiya vaita mai'netapae'mo Ala kava ne'mo akame huteta o'atalegaune, hutapa hiyo, huno apaipa apakesa alino lokiya vaino apate'niye. 24 Manamasi'a alagepa vekamo Goti Auneme'amo'mo aipafi'mo havai te'nigeno lokiya vaino agesa afino fatago nehiya vekamo'a asole vaya'mo apayate alinino Ala kava netegamo e'niye. 25 Inagi Manamasi'a apatalenuno Solofe'mo kahauya huno agegefe'mo Tasasi taonifi'mo uno 26 ago ageno avateno avalelino Atiyoki taonifi'mo e'niye. Anakaemo mago kafugamo siosi vaya'e'mo ali'ana anupa hu'ana mai'ne'anae'mo asole vaya'mo ali'ana apaya male'na'ae. Atiyoki taonifi vaya'mogimo ge'amo ne'afiya vaya'aife'mo apaki'apimo Kalisitini vayane hu'a hogote afina apaki apate'nae.

27 Ani afina'mo mago vaya'mo Gotitegati gemo alini e'a ae'a hakalo hu'a hapa nepaiya vaya'mo Yulusalemu taonifati'mo e'a Atiyoki taonifi'mo ava'yi hu'nae. 28 Ani vayapati'mo mago vekamo agi'amo Agamasi'a he tino Goti Auneme'aleti'mo mago gemo hapa paino'ae'mo, Muki aupilagamo kafu hisaya kava'mo afole aigiye, huno hapa pai'niye. Ala vekamo Kilotiyasi'a vaya'aite'mo yagaino ne'apateya afina'mo ani agufa kafu hu kava'mo afole ai'niye. 29 Ge'amo ne'afiya vaya'mogimo ani gemo afite'apae'mo, Yutiya kotega mai'naya konagatimogi hapa maeta na magi monimo male'nopigeta ani kava'mo huta magoke magoke huta apamigune, hu'a hu'nae. 30 Ani kava'mo hute'a Manamasi'e Solo'e'mo monimo anami'na'age'ana alini u'anae'mo Yulusalemu taonifi Goti mafa'ne'aite'mo yagai'a ne'apataya vayatama vaya'mo apami'na'ae.